أسئلة شائعة

،

هذه عدد من الأسئلة المهمة أو الشائعة على صفحة ملاك وشهد في Ask.fm نتمنى الاستفادة منها.. يتم تحديثها دوريًا 

س1: كيف أحسب معدلي؟
- الطريقة بشكل عام هو مجموع النقاط مقسومًا على عدد الساعات، ولكن فيه مواقع تسويها لك أوتوماتيكيًا
تطبيق معدلي
https://appsto.re/sa/NTmw0.iموقع جامعة أم القرى (أدق ولكن أبطأ بالتعامل)
http://www.qu.edu.sa/gpa.aspx

س2: كم لازم أجيب عشان أدخل طب؟

عندك خطوتين للقبول في الطب 1- القبول في المسار الصحي 2- الحصول على مركبة تخصيص عالية.

ماهي مركبة التخصيص؟ ( المعدل الجامعي فـxـي 10 + نصف مركبة قبولك "30% قرات 30% ثانوي 40% تحصيلي" )

وهذه نسب تخصيص دفعة 435



وهذه نسب تخصيص دفعة 436



س3: ما انقبلت طب وش اسوي؟
- إذا تبين طب بشري الحلول البديلة إذا ما انقبلتِ:
١- تدرسين بجامعة اخرى وتعيدين تحضيري عندهم
٢- تروحين قبول مباشر طب بجامعة الفيصل إذا جبتِ آيلتس ٦.٥
٣- تكملين بكالوريوس بالتخصص اللي انقبلتِ فيه "عدا التمريض" بعدها تنضمين لبرنامج تجسير الطب بالحرس لـ ٥ سنين ونص (أطول حل لو حبيتِ تجربين تخصصك اللي انقبلتِ فيه)

س4: أيش المعدل المثالي بعد سنة أولى طب؟

- معايير كل شخص وأهدافه تختلف، فيه ناس تبي مرتبة الشرف الأولى فيه ناس مرتبة شرف أهم شيء وفيه ناس أهم شيء تتخرج وفيه ناس أهم شيء ما ترسب، طبعًا اللي يبي تخصص عليه تنافس مثل التجميل والجلدية والعيون لازم يركز على معدل عالي، ومجددًا العالي عندك ممكن تعجيزي بنظر الغير، شخصيًا؟ أشوف إذا طلعتِ من أولى طب بفارق 0.10 ممتاز جدًا جدًا جدًا

س5: ايش فيه اشياء ممكن اشتغل عليها في سنة أولى لل CV حقي؟
- تجيبين أعلى معدل تقدرين عليه :) أهم شيء
تشتركين بنوادي تطوعية عندك في كلية الطب (نادي نبض الطب للطالبات هذا اشتركت فيه، نادي حياة للطلاب والطالبات
مشتركة فيه، نادي الطب للطلاب والطالبات)
- تجمعين بيانات لبحوث -بحثين بس- (المجلس الطلابي بيرسلونها ع الايميلات بشكل دوري) وحاولي يكون بشيء تميلين له قدر الاستطاعة
- تشاركين بأحد مهام المجلس الطلابي إذا قبلوك

س6: وين ندرس طب بجامعة الملك سعود؟
- الطالبات:

- أول سنتين: في كلية الطب بالمدينة الجامعية للطالبات
- سنة ثالث رابع خامس: الدور الثالث بمبنى العيادات الخارجية في مستشفى الملك خالد الجامعي

الطلاب:
- أول سنة: الدور الأول والثاني بمبنى العيادات الخارجية بمستشفى الملك خالد الجامعي
- باقي السنين بكلية الطب بالمستشفى

سنة اولى طلاب حسب حظهم إذا خلصت الكلية الجديدة أو لا يداومون فيها أو يستمرون بالعيادات

س7: أيش نصائحك لاختيار التخصص؟ أبغى تمريض وأبوي رافض!

- بكل حيادية: التخصصات الصحية كلها فيها خير وبركة، مع قول ذلك فيه خيارات وظيفية أفضل من ناحية الراتب وأوقات العمل..
اصرار أبوك مو هدفه التحكم، أكيد بالنهاية يبغالك الأفضل بنظره..
أول شيء أقدّر لك اصرارك على هدف حطيتيه قدامك، والتخصصات قربت تفتح..
جربي تخلين عقلك مرن، كوني حيادية جدًا من هالناحية.. جيبي ورقة واكتبي التخصصات كلها "قبل تفتح البوابة"
لاتفكرين بالدراسة بالكلية وهذي لاتخلينه معيار مقارنة.. شوفي أنتِ ليش تبغين تمريض؟ اكتبي أسباب منطقية مو عشاني أبيه.. وشوفي وش اللي ممكن تكرهينه فيه.. شوفي خطة الوظيفة والرواتب (لأنه معيار جدًا مهم من ناحية لو تفكرين ١٠ سنين قدام). شوفي وش اللي يقدمه لك التمريض مو موجود بالطب، شوفي وش بالطب شيء مو موجود بالتمريض، شوفي التخصصات بالطب اللي دوامها خفيف.. ترا فيه خيارات كثيرة فيها احتكاك بالمرضى وفيه بدون، فيه خيارات اكاديمية وفيه بحوث.. يعني قارني بين التخصصين وطلعي اسباب قد ماتقدرين، اهم شيء تشوفين وش اللي بالتمريض مو موجود بالطب والعكس صحيح، جدًا يهمني موضوعك أتمنى بعدما تسوين هذا الشيء وتاخذين وقتك فيه تكتبين لي وش طلع معك، مرة ضروري تسوين هالاشياء قبل ماتتناقشين مع أبوك عشان تكون عندك عدة أسباب تناقشين فيها! موفقة

س8: كل شخص لازم يكون عنده دافع وشغف حتى يوصل للي يبيه ايش شغفك ودافعك للدرجات الكاملة +الطب ملاك ؟ يمكن تفتحين عيوني على شي مغمضه عنه:(

- ما أعرف ما أذاكر زين، ما أعرف والله.. تعودت أجيب أعلى الدرجات إذا ماكانت كاملة وكل اللي حولي صاروا يتوقعون مني الشيء هذا، يمكن معاييرهم العالية عني كانت دافع، ويمكن أنا أحب أتميز.. مثل ما قالت وحدة عزيزة pretty good is not enough, I wanna be great!
ما أبغى أكون منسية، ما أبغى أكون تحت الظلال، أحقق ذاتي إذا جبت درجات عالية وأحس بالإنجاز لأني سويت شيء غير!
بالنسبة للطب؛ ما أقدر أقول أنا اخترته أحس هو ماعطاني أي مجال آخر أحبه مثله، ماتتخيلين وش كثر أحس بالراحة إذا رحت مستشفى متيقنة أنه مكاني، ويزداد شعوري أكثر لما أخدم المرضى بحاجة، تحسين إنك غيرتِ حياة إنسان ولو بشيء بسيط، كيف ممكن تدرسين سنين وتكرسين حياتك كلها للطب وين تلقين شرف أكبر من هذا!! كم مرة مر عليك موقف تمنيتِ انك تملكين المعرفة عشان تغيرينه، فلان يشكو من مرض، فلان غص بحاجة، فلان غرق ويحتاج إسعاف طارئ.. الطب يعطيك -على الأقل- المعرفة هذه .. ماعادك جاهلة! الطب للعمر

س9: طبيعي اني ابي أكون دائماً متفوقة و للأسف أغير اذا احد تفوق علي..نفسيتي تعبت من المقارنة 

- أي شخص مهما كانت درجاته ومين ماكان لازم يكون مر بالمرحلة هذي، اللي يقارن نفسه بغيره ومهما جاب مايرضى، الإنسان بطبعه يحب يتفوق خصوصًا المجتهد يكون غير قنوع.. أنا مريت فيها
بقول لك من باب تجربة، بداية الترم الثاني بالتحضيري كنت أنقص بالمدات واشوف اللي حولي يجيبون كامل ولا أعلى مني، ماتتخيلين وش كثر كنت أتحطم أقول بنفسي وش فرقك عنهم ليش أنتِ غبية ومن جلد الذات هذا! كنت أناظر اللي فوقي ولا قد فكرت كم شخص حالتي أحسن من حالته، كم شخص أعلى منه بالمركبة!
بعد بداية مد ٢ تغير فكري تمامًا ووصلت لقناعة أنا بسوي اللي علي، ماراح اسأل اي احد كم جاب عشان أبعد نفسي بالغصب عن المقارنة لين أتعود.. وفعلًا تعودت والله، صرت مستحيل اسأل أحد بنية أبي أعرف درجته، اللي يبي يقول لي حياه اللي ما يبي حر إلا صديقاتي طبعًا، صدقيني والله راحة نفسية وقناعة حتى أنك ماتتعذبين بالمذاكرة (لأنك ماتدخلين بدوامة اووه أنا اذاكر بس ما احصل درجات) خصوصًا كلية الطب، يعني معدل A يعتمد على مجهودك، لكن الاي بلس تعتمد على نفس الاختبار.. أنا افهمك لأني مثلك، فيه ناس يسعون للكمال وطول عمرهم يبون الأحسن ولا يرضون بالقليل، ولا أقول لك ارضي بالقليل لكن لا تسعين وراء درجات كاملة، دايمًا أنا أحط لنفسي رينج بلوكات يعني أقول لو جبت بي أنا راضية وفعلًا ما أقولها كلام بس لكن اشتغل على اساس بجيب أي أو اي بلس! مهما جتك افكار تسالين فلانة لا تسألينها وعليك من نفسك وبس، إذا هي جابت اعلى منك بالاختبار هذا أنتِ يمكن تجيبين اعلى منها باللي بعده، بالنهاية هي مرتاحة و أنتِ متعذبة

س10: هل يصير فيه بيننا وبين العيال تواصل كثير بالطب ؟ لازم يعني
- في أول سنتين لا، فقط لا مو لازم، ليدرز التيمات + قائدة الدفعة + الأكادمك ليدر + الكلينكل ليدر + قائدة الساك + اللي تمسك حساب الدفعة .. هم اللي يضطرون يتواصلون مع الطلاب بشكل مباشر. في السنين الإكلينيكية قد تضطرين لذلك بحكم أن الطالبات بيصيرون بالمستشفى؟
س11: كيف قصدك مباشر يعني نقابلهم في مكان والا اتصالات بينا فقط

- يعني حديث وتساب أو مقابلة مباشرة على حسب، يعني قائدة الدفعة بتضطر تقابلهم بالاجتماعات، بس قائدات التيمز تواصلهم وتساب فقط

س12: ؟وشو قائدة الساك؟ايش شغلتها
- الإشراف على عمل فريق الساك ( يجتهدون بكتابة كيسات تشبه الساك SAQs short answer questions، يجمعون الاشياء اللي انذكرت باكثر من مادة على شكل كيس، يلخصون.. ومن هالكلام) يمديك تشوفين شغلهم هنا

http://ksumsc.com/download_center/1st/5.%20Renal%20block/435%20Teamwork/SAQs/
بالإضافة إلى أنهم يمرون على الدكاترة قبل الاختبارات يسألونهم وش بيجينا ويحاولون يطلعون منهم كلام

س13: ملاك الحين في الطب على اي اساس يختارون الليدر ؟ وهل فيه اكثر من وحدة؟
- أول اسبوع يرسلون لكم فورم أو رقم وحدة تسجلين عندها اسمك، بالأسبوع الأول كل مرشحة تلقي كلمتها قدام البنات، وبنفس الوقت يصير تصويت على الليدر. فيه قائدة دفعة، وفيه سب ليدر لها (مساعدة)
فيه قائدة أكاديمية وليه مساعدة لها، الأكاديميك تشرف على التيمز واكتمالهم وتراجع المحاضرات اللي يسوونها، طبعًا وجود المساعدة يعتمد على رغبة القائدة الأساسية
نهاية السنة يقولون اللي تبي تترشح ترسل اسمها بالفورم.. بس غالبًا تستمر نفسها لأن البنات يكونون عارفينها وبيصوتون لها.. ليدر ٤٣٤ استمرت وليدرنا ٤٣٥ استمرت 

س14: ابغى نصيحتك ، كيف اخلي كلام الناس ما يأثر فيني ، الكلام العنصري اللي اتلقاه بقصد او بغير قصد يعور والله احس حتى فيني اشياء تغيرت من الناس ، ما ودي اصير سوداوية و حقودة 

- ممكن اكتب لك عشر سطور عن الشيء هذا، لكن بالأخير مو كلامي اللي بيغير شيء، التغيير فيك ومنك يبدأ. الناس تقول اللي تقوله طول عمرهم يتكلمون ولا تتوقعين بيوقفون بيوم، لكن أنتِ سمحتِ لكلامهم يأثر، محد يوجعك إلا بإرادتك! امسكي ورقة واكتبي فيها كل شيء تشوفينه بنفسك ولا هو موجود بغيرك (خصوصًا اللي يتكلمون عنك بعنصرية) وشوفي وش كثر أشياء أنتِ ناجحة فيها ومميزة أكثر منهم :) وش يهمك وقتها "مجرد كلام" لا يودي ولا يجيب إذا استوعبتِ حقائق عن نفسك؟ اعرفي نفسك أول وقدريها، مجر ماتوصلين مرحلة القناعة هذي والله لو وش مايقولون ماراح يأثر فيك الا بشكل بسييييط ومو من أي أحد

س15: ملاك ايش بتسوين اذا كان ودك مسار صحي و امك وابوك عادي عندهم تدخلين اي تخصص تبينه سواء مسار علمي او صحي بس ماودهم بالصحي بس مب مانعينك، يعني لو دخلت طب مثلا احس احتاج ناس تشجعني طول الوقت واحس هم مب عاجبهم فماراح يشجعوني اذا تعبت وبيقعدون يقولون محد قالك ادخليه

- بقول لك حاجة ضروري تكون ببالك، أكبر خطأ تقرنين نجاحك ومثابرتك بتشجيع الناس، أوقات كثيرة تلقين محد فاهمك واللي تمرين فيه غير نفسك، حتى أهلك مستحيل يحسون لانهم مايدرسون اللي تدرسينه، القي التشجيع والدافع بداخلك (وهذا كلام مو وردي) هذا اللي صدق يصير، بالنهاية اهلك لو تحلطمين عليهم باي تخصص قالوا نفس الكلام محد قال لك ادخليه، لا تتوقعين تكبرين والناس تستمر حولك تقول اييه صح عليك كملي، بالعكس احيان كثيرة تلقين ناس ضدك... إذا أنتِ راغبة بالشيء هذا قو أهِد

س16: أهم النصائح لدفعة٤٣٧؟
- ١- قيموا الوضع زين وشوفوا قدراتكم واسألوا دفعة ٤٣٦ ( اسألوا أكثر من شخص من مختلف المستويات الدافورية والغير دافورية ) عشان تكون نظرتكم شاملة، واعطوا نفسكم معدل تقريبي واحسبوا مركبة تخصيصكم، بناءً على هذا قرروا الخيار السليم للجامعة اللي بتروحون لها، أهم شيء تقييم النواحي هذي بمنطقية عشان ماتنحطون بمكان تعيدون فيه السنة
٢- خلوا هدفكم التخصص، وليس الجامعة
٣- اعطوا التحضيري كل شيء عندكم، سنة وحدة تقرر مصير حياتك
٤- كل شيء وارد حدوثه، ممكن تتعبين ولا تحصلين اللي تبينه، والله مو نهاية الدنيا وياكثر الناس اللي ماوقفوا على كذا، فيه حلول بديلة كثيرة لرغباتك
٥- اقرؤوا عن التخصصات بشكل مبسط من الحين، حطوا ببالكم رغبتين ثلاثة مبدئيًا وقيموا وضعكم والجهد المطلوب لتحصيله
٦- لا تقاااارنون أنفسكم بأحد، تعب نفسي أنتم في غنى نفسه
٧- كل التخصصات مكملة لبعضها، سواء صحية أو علمية أو إنسانية، كلها لتطوير المجتمع.. مهما كان تخصصك لا تستحقر غيرك وتأكد إن هذا دليل جهلك وحرام فيك الشهادة 😃
٨- بتكون نصيحة غريبة، لكن مو الكل نمط مذاكرته وحدة، مو شرط تذاكر أول بأول عشان تحصل معدل ٥، قيه ناس تشتغل احسن إذا انضغطت وفيه ناس العكس، اعرف أنسب طريقة لنفسك بوجه موضوعي (يعني مو تسليك عشان تستانس بوقتك)
٩- طور الإنجليزي لنفسك مهما كان التخصص اللي ناويه، حنا بعصر اللي مايعرف فيه إنجليزي يعتبر متأخر عن وكب التطور
١٠- استمتع بإجازتك وبالتحضيري وبالتخصصك وطول العمر، لنفسك عليك حق.. أحيانًا بقفل المخ من كل شيء بالحياة، استمتع بالعزلة، استمتع بالطلعة! اهم شيء اطلع عن كل الأجواء ولو يوم واحد وبترجع أقوى وأقوى

س17: يقولون مستحيل تجيبين معدل عالي بالجامعه ويستهينون فيني أحس كلامهم أثر فيني وجرحني بقوه لأنهم أقرب الناس لي وش تنصحيني فيه

- كونهم أقرب الناس لك لا يعني إن كلامهم صح ولا غالبه صح! محد يعرف قدراتك الا نفسك، اثبتي لنفسك انك تقدرين قبل أي أحد، مثل ماقلت قبل لا تعتقدين إن الحياة بتستمر سهلة ولا دايمًا بتلقين ناس حولك تشجعك، أنتِ تحسين انك تقدرين اذًا أنتِ تقدرين باذن الله. المعدل مسألته والله أسهل بكثير مما تعتقدين فيه كثير جابوا ٥ تحضيري وفيه كثير معدلاتهم فوق ٤.٩+ بعد أول سنة تخصص. دايم اللي مايعرف التخصص ولا يعرفك صح يقول عنه شين ولا تقدرين، صدقيني والله (اللي ما يطول العنب حامضٍ عنه يقول) وصدقيني جيبي اعلى درجات لاقدرات والتحصيلي ويوم من الايام باذن الله اقابلك في كلية الطب، إذا محد آمن فيك مو لازم لأن إيمانك بنفسك هو أهم محور في نجاحك، أنا مؤمنة فيك

س18: ملاك وش رايك ب فكرة انو اخلص الثانوي و عطول اقدم ف برنامج الملك عبدالله للابتعاث ؟ ابي ادرس طب ف االمانيا او كندا ،، يصير يعني ؟ ولا فيها صعوبة ؟ و بسألك سؤال شاطح كذا ، انتي ماشاءالله مركبتك كانت عالية ليش م قدمتي ع الابتعاث ؟

- فعلًا كانت الظروف ودرجاتي تؤهلني، وفكرت وبحثت وشفت.. لكن ماكنت مستعدة! حتى لو الإنجليزي عندي ممتاز، إذا ببلدي وبالسعودية وبالتحضيري أول سنة أحس بالتشتت، ماحسيته قرار سليم أشتت نفسي بالغربة وأنا في بداية حياتي الجامعية، ناهيك عن أن كليات الطب تتطلب أن الشخص يكون عنده بكالوريوس في أحد العلوم (مثلا كيمياء حيوية) قبل أدخل طب، يعني زيادة ٤ سنين على مشوار الطب! وليش؟ يمديني ادرس طب هنا وبعدين أكمل دراستي برا، إذا تفكرين بهالشيء أنصحك بكامل قناعة تأجلينه لما بعد البكالوريوس

س19: وش تقترحين علي اسوي بالصيفيه انا تحضيري ، افكر ابدا احضر لبلوكات الطب وش رايك؟
- أقترح: ماتسوين شيء! فعلًا!
قبل سنة لما كنت مكانك سألت المتخصصين بالطب وكلهم قالوا لي لاتسوين شيء، ماصدقتهم! طيب ترمنولوجي مصطلحات طبية أي شيء؟ وجاني الجواب: لا!
ما اقتنعت وقتها بالرغم من تكرر الإجابة هذي وحسيت إني ممكن أسوي شيء وإني مقصرة لو ما استغليت إجازتي، لكن بالنهاية مشت الأيام بدون أسوي شيء واستانست بأقصى استطاعتي، صدقيني إجازة مابعد التحضيري غييير خصوصًا إنها ٤ شهور!
لاتستعدين أبدًا لكل شيء وقته، أنا جربت وأقول لك الشيء هذا، الشيء الوحيد اللي ممكن أنصحك فيه تطورين لغتك و أنتِ تستانسين بنفس الوقت (أفلام) .. صدقيني الاستعداد هذا مو زايد لك بس ينكد عليك

س20: أقدر أجيب 5 بالطب؟ ممكن لو اخذنا نصايحك واغلاطك بهالبلوك مع الاجتهاد ممكن نجيب 5 ولا؟ وإذا درسنا التيمز نقدر نضمنها ؟
- شيء مو سهل، لكن فيه عدد جايبين فوق ٤.٩ سبق وقلت اللي بيجتهد صدق بيجيب A .. والأي بلس بتعتمد على طبيعة الاختبار ٥ درجات هذي اعتبرها بيد الكلية والأسئلة اللي يجيبونها. قراءة الكلام والنية حاجة، والفعل اثناء الضغوط والقدرة عليها و مدى سرعة اكتشافك لطريقة مذاكرتك شيء حاجة ثانية.. يعني ما اقول لك مستحيل، بس اقولك مرة مرة مرة صعب مقارنة بخمسة التحضيري وضوء تصعيب الكلية للبلوكات، لعدة أسباب .
التيمز اجتهاد طلاب لا تعتمدون على الكلام فيها اعتماد كلي.. فيه تيمز ما قد اخطؤوا أبد فيه تيمز بس بالفاونديشن فيه تيمز ينسون معلومة ويكون شغلهم ناقص فيه تيمز رائعة جدًا.. سواء ذاكرتِ تيمز أو من السلايدات هذا لا يضمن إن المعلومات ماتطلع منهم، والمذاكرة بحد ذاتها لا يعني تمكنك من الاختبار عندك نقطة الفهم ممكن تقوينها ببعض الفديوات باليوتيوب، بالنهاية أنا جبت ٥ بالتحضيري، وبالنسبة للخمسة بالطب نادرة جدًا ومو مثل التحضيري (اووه بشد حيلي واقدر اثبت للناس العكس وكلام الناس لازم ما اسمعه) فيه شيء صدق ماتسمعينه وفيه شيء واقع، الخمسة فعلًا صعبة ونادرة لأسباب من الكلية نفسها.. هنا بعضها.. بيت القصيد ركزي تجيبين +٤.٩ بالطب هذي تعادل الخمسة وتعتبر انجاز عظيم
على دفعتنا تصعبت أنك تاخذ خمسة أكثر، على علمي محد من البنات جاب خمسة ومن العيال كان واحد مدري إذا جاب بلس بالرينل.. ودفعة ٤٣٤ أعتقد بنت ولا بنتين .. للأسباب التالية:
١- تخصيصنا حسب نظام المركبة .. هذا قلل معدلات دفعتنا لأن سابقًا أقل وحدة معدلها ٤.٨٩ والحين ممكن تلقين وحدة معدلها 4.5 مركبتها ساعدتها
٢- الدفع اللي قبلنا كان عندهم اختبار ميد للبلوكات ف يضمنون درجات، حنا لا فقط فاونديشن
٣- اختبار الساك كنا أول من يختبره من الفاونديشن وماعندنا فكرة عنه.. حتى نفس الكلية ماكانت عارفة نظام معين كل شوي يغيرون طريقتكم بكتابة اسئلته
٤- الكلية بنفسها يبون ينزلون معدلات الطلاب لأن صاروا الخريجين كثير منهم مراتب شرف، ناهيك عن الاعتماد الأكاديمي للجامعة (حسب علمي)
شوفي على سبيل المثال في بلوك الجهاز التنفسي للطالبات فيه ٢٪ اخذوا اي بلس يعني تقريبًا طالبتين من أصل ١٠٠
في بلوك الجهاز الدوري الدموي ١٣ بنت أخذت أي بلس من أصل ١٠٠
وهذا مو شرط إن احد البنتين من ضمن الـ ١٣ اللي بعدين.. عرفتِ ؟
يعني مرة مرة صعب أنك تاخذين بكل البلوكات أي بلس، ممكم تنقصين بواحد ولا اثنين وترا شيء مرة عادي ومثل ماقلت اللي يجيب ٤.٩+ بسنة اولى يعتبر ممتاز لأن كثير جابوا ٥ بالتحضيري ونزلوا لـ C أو D لأسباب كثيرة منها صعوبة المحتوى مقارنة بالتحضيري وبعضهم عشانه ضمن الطب خفت مذاكرته.. بيت القصيد خلي طموحك درجات عالية لكن لاتقرنين نفسك بالخمسة عشان ما تنقهرين
هنا متوسط معدلات دفعتنا.. احسبي الفيميلز ١٠٠ وعلى أساسها شوفي عدد الطالبات وكم جابوا قريد
https://twitter.com/med_435/status/712601847337451520

س21: الأخصائي هو نفسه الاستشاري؟
- لا طبعًا فرق بينهم، الاستشاري أعلى.. مثلا واحد توه مخلص سنة الامتياز، دخل برنامج إقامة بالباطنة، خلص صار أخصائي باطنة.. بعدها يصير استشاري متخصص بشيء دقيق بالباطنة مثلًا غدد صمّاء

س22: (مشوار الطب) واحد يقول الطب سبع سنوات دراسه عامه للطب بعدها تخصص وش يقصد مافهمت؟
- يعني التخصصات الأخرى يدرس ويتخرج ويتوظف بمسمى واحد، الطب ليله طويل

- بعد سنين الكلية اللي هي ٥ سنين، تجي سنة امتياز، بعدها اللي يتخرج بمسمى طبيب عام ( نادر احد يبقى كذا عشان الراتب قليل + غير مطلوب ) ويقررون يكملون برنامج إقامة..
فرضًا أنا قررت أتخصص جراحة مخ وأعصاب ٦ سنين، خلال الست سنين هذي بيكون مسماي طبيبة مقيمة بقسم جراحة المخ والأعصاب تابعة لمستشفى معين خلاص مالي علاقة بالجامعة.. أشارك بجراحات بسيطة بالمخ وكلما مرت السنين كلما صرت أشارك أكثر.. يعني استلم حالات + راتب واداوم بالمستشفى.. خلال السنة هذي يختبروني .. يعني كثير يفهمون خطا إن اللي يتخصص يدرس بس لا يكون طبيب ويعالج مرضى.. بعدما يخلص برنامج الإقامة يصير مسماه أخصائي..
بمعنى إذا رحتِ مستوصف وسمعتِ طبيب عام يعني طالب طب توه متخرج (غير مؤهل يعالج حالات صعبة لأنه ماتخصص وعنده معرفة عامة) واذا سمعتِ طبيب باطنة يعني درس بعد التخرج ٤ سنين

س23: صدق الفرص الوظيفية لخريجين الطب من كل الجامعات الحكومية متساوية ؟ وش يأكدلك ؟

الخريج يمر بعدة مراحل
١- تخصصه يتحدد بـ ( ٥٠٪ اختبار SMLE ٣٠٪ معدل جامعي، ٢٠٪ سيرة ذاتية موزعة على عدة نقاط)
٢- بعد ظهور تخصصه يروح يدور سبونسر (مستشفى) يسوون له مقابلة
الوظيفة تتحدد بمقابلة المستشفى هذي
( هذا كلامي للبنات )
لما تجين تدورين سبونسر مستشفى بعدما طلع تخصصك بهيئة التخصصات الصحية، يسوون معك مقابلة شخصية < المستشفى
يشوفون سيرتك الذاتية، بحوثك، الدورات اللي حضرتيها بالتخصص، انشطتك التطوعية، معدلك الجامعي < مرتبة الشرف يمكن تفرق عند البعض لكن مو شيء محوري، أي شيء من هالقبيل وعلى أساسه يفاضلون بينك وبين اللي متقدمين لنفس برنامج الاقامة هذا لأن الاماكن تكون قليلة
ماراح يفاضلون ٢٠ متقدم على ٦ مقاعد بالمستشفى بناءً على انه خريج جامعة الملك سعود
هيئة التخصصات قاعدين يحاولون يقللون دور الجامعات بتحديد التخصص بعد كل مالهم ينقصون نسبة المعدل ويخلونه كله سيرة ذاتية واختبار SMLE عشان العدل بين خريجيّ الجامعات
* إضافة (طبيب) امتياز: صحيح
واصلا عدد المقبولين في التخصص من قبل الهيئة تزيد بنسبة ١٠٪ عن عدد المقاعد.. وهذا يقلل نسبة رفض المتقدم من قبل المركز

س24: ايش اسباب رفض الواحد بمقابلة المستشفى برايك ؟
- أولويات المستشفيات تختلف، بعضها تهتم بالبحوث جدًا، بعضها تهتم بالمعدل، بعضها تهتم بالسيرة الذاتية ككل، يعني الخلل ممكن يكون إن معدله ضعيف جدًا للتخصص اللي هو يبيه، أو انه تأخر على المقابلة، ما أدّى كويس ولا كان واثق بنفسه، وفيه سبب جدًا مهم الكثير يغفلون عنه، بعض المستشفيات ترفض اللي اختبر اختبار الرخصة الامريكية USMLE لأنهم يخافون يسحب عليهم أول مايجيه قبول في أمريكا
أحد توجهات التحول الوطني زيادة مقاعد التدريب من ٢٢٠٠ إلى ٤٠٠٠ في ٢٠٢٠ سنة تخرجنا، نقول يارب

س25: في سلم الرواتب في شيء مافهمته الي هو المستويات الاول الثاني ..الخ؟ والارقام بعد الي بالمستوى نفسه؟؟

- كل درجة = سنة، الفرق بين كل درجة ودرجة هو مقدار العلاوة السنوية، جراحة قلب ٧ سنين يبدأ براتب ٩٢٠٠ ويتخرج ب ١٢٢٩٠ يعني المستوى الثاني الدرجة الثالثة ( طبعًا هذا بدون البدلات والزيادات )
لما يخلص يبدأ من الدرجة الأولى طبيب نائب (أخصائي) وهكذا.. إن شاء الله فهمتِ، هذا بعدما سألت طبيب امتياز إن شاء الله تكون المعلومات صحيحة (طبعًا هذا للطب ما عندي خلفية إذا نفس الطريقة تمشي ع التخصصات الأخرى)

س26: ودي ادخل طب بس اخاف محد يخطبني
- البداية، حطي ببالك واحفريه زين زين زين (وظيفتك أهم من أي رجل بالدنيا) ولو انه كامل الوصوف. الوظيفة مضمونة لكن إن تركتيها زوجك ممكن يطلقك يتزوج عليك يخونك الخ الخ الخ من أسوأ الاحتمالات

لايكون هدفك التفكير بالزواج، كذا اصلًا بترضين بأي رجال يجيك لأن عيونك تزيّنه (لانك تنتظرينه) واللي مايبي يخطبك عشانك طبيبة مو بحاجته ياعزيزتي أنتِ في غنى عن العيش مع ناس معقدة كذا والله، ممكن يخلي يسوّد عيشتك.
أخيرًا: لا تخافين الرزق واجد وبكل مكان، ياكثر طلاب الطب والطالبات والدكاترة اللي تزوجوا من بعض، وفيه طلاب أعلنوا زواجهم وهم في سنة ثالث

س27: كم عدد مواد مستوى اول طب؟ وايش هي؟ الحين كيف البلوكات نظام سنوي وانتم تاخذونها بترم واحد ؟ يعني كل بلوك بترم

- مستوى ثالث = سنة أولى طب، بحكم أن التحضيري مستوى أولى وثاني، ومن بعدها يصير كل مستوى بسنة لأن نظام الطب سنوي.

سنة أولى وثاني " سنين العلوم الأساسية Basic Science " دراستهم عبارة عن نظام الـ Blocks وهو دراسة المواد الأساسية ضمن إطار موضوع معين، عندك بسنة أولى خمس بلوكات، اثنين في الترم الأول وهي Foundation تأسيسي يعطيك من كل بستان وردة، وبلوك الجهاز العضلي الحركي Musculoskeletal ، الترم الثاني ٣ بلوكات الاول التنفسي Respiratory وبعده الدوري الدموي Cardiovascular والأخير البولي Renal ..
تصيرين تدرسين المواد "عادةً ٧-٩ مواد" مثل صيدلة، انسجة، تشريح، علم امراض..إلخ المختصة بالبلوك مثلًا التنفسي تدرسين أكثر الأمراض شيوعًا وعلاجها وتشريح الاعضاء في الجهاز التنفسي..
يكون عندك ميد للبلوكات اللي فوق ٦ أسابيع.. بسنة اولى فقط الفاونديشن الباقي بس فاينل، يكون عندك يومين فاينل، يوم فيه اختيار من متعدد MCQs + كتابي إجابة قصيرة SAQ، وبعده بيومين اختبار عملي OSPE
ونتيجة هذا الاختبار هي اللي تحدد القريد حقك للبلوك كاملًا، وأكثرهم الفاونديشن عليه ١٠ ساعات

س28: ايش هي مواد الطب ؟
- هي المواد التي درس ضمن جهاز جسم. فيه بلوكات تنقص كم مادة وفيه بلوكات تزيد، مواد سنة أولى بشكل عام (غالبها تدرس في كل البلوكات)

- علم وظائف الأعضاء Physiology
- علم الأمراض Pathology
- علم الأنسجة Histology
- علم التشريح Anatomy
- علم الأدوية Pharmacology
- علم المناعة Immunolgy
- الكيمياء الحيوية Biochemistry
- علم الأجنّة Embryology
- طب الأسرة Family Medicine
- علم الاحياء الدقيقة Microbiology
- علم الأشعة Radiology
- الوراثة البشرية Human genetics